9 معلومات عن المدارس المصرية اليابانية بوزارة التربية والتعليم

تدهور وانحدار المستوى التعليمي في عدد كبير من المدارس الرسمية مؤخرًا أدى إلى نفور أولياء الأمور من التقديم لأولادهم في المدارس دي، والبحث عن بديل يوفر نظام تعليمي بجودة أعلى زي الأنظمة الانترناشونال مثلا، ولكن مصاريف الأنظمة دي بتكون مرتفعة في الغالب، وبتسبب عبء على أولياء الأمور.

ومن هنا كانت المدارس المصرية اليابانية بوزارة التربية والتعليم هي أنسب اختيار؛ لإنها بتقدم مستوى تعليمي مميز عن الموجود في باقي المدارس الرسمية وبمصاريف أقل من الموجودة في المدارس الانترناشونال.

في المقال دا هنتعرف على المدارس المصرية اليابانية عن قرب، ونفهم نظام التعليم فيها، ونعرف أهم المميزات والعيوب الموجودة في المدارس دي.

1. نظام التعليم في المدارس المصرية اليابانية

المدارس المصرية اليابانية هي مدارس حكومية تابعة لوزارة التربية والتعليم المصرية بدأت في 2018 ولا زالت مستمرة.

المدارس بتقدم المنهج المصري بطريقة مختلفة متطابقة مع أحدث الأساليب التعليمية وتطبيق أنشطة التوكاتسو اللي بتساعد في بناء جيل واعي وقادر على تحمل المسئوليات.

كمان المدارس حريصة على تطبيق أنشطة التوكاتسو من بداية دخول الطالب للمدرسة، ودي مجموعة أنشطة مختلفة بتأثر بشكل كبير في نمط تربية الطفل، وبيقدر من خلالها يتعلم المهارات المختلفة.

المدرسة بتتيح لولي الأمر فرصة مشاركة الطفل في يومه الدراسي، فبتقدم 20 ساعة تطوعية لولي الأمر يقدر من خلالها يشارك في الأنشطة المختلفة مع الطفل، أو يقدم توعية للطلبة خاصة بمجال شغله، أو غيرهم، وولي الأمر بيمضي إجباري على استعداده لقضاء 20 ساعة مع الطالب خلال السنة الدراسية، ودا بيكون له تأثير إيجابي في يوم الطفل الدراسي.

الدولة حريصة على تقديم أفضل نموذج تعليمي في المدارس المصرية اليابانية، فبيتم إجراء اجتماع لمديرين المدرسة كل 3 شهور مع رئيس الجمهورية للتعرف على أهم التطورات في المدرسة، والتأكد من تطبيق النظام التعليمي بالشكل المطلوب.

2. لغة الدراسة في المدارس المصرية اليابانية بوزارة التربية والتعليم

المدارس المصرية اليابانية بتقدم مناهج مصرية زي ما وضحنا، وفي بداية تطبيق الفكر التعليمي الياباني كانت المناهج بتُدرس باللغة العربية زي ما بيحصل في باقي المدارس الرسمية -الحكومية-.

مع الوقت بدأ أولياء الأمور يقدموا طلبات للمدارس؛ عشان يغيروا لغة التدريس إلى اللغة الإنجليزية، وبالفعل استجابت المدارس المصرية اليابانية بوزارة التربية والتعليم للطلب دا وأصبحت المناهج تُدرس باللغة الإنجليزية.

ملحوظة: المدرسة بتهتم باللغة العربية واللغة الإنجليزية فقط، والطالب مش بيدرس لغات تانية على مدار سنوات دراسته.

3. شروط الالتحاق بالمدارس المصرية اليابانية

المدارس المصرية اليابانية بوزارة التربية والتعليم بتفتح أبوابها للتقديم كل سنة لمدة 15 يوم فقط، وخلال الأيام دي لازم ولي الأمر يقدم الأوراق المطلوبة ويتبع جميع الشروط عشان الطالب يتقبل فيها.

من شروط التحاق الطالب بالمدرسة اليابانية:

• تقديم بيانات الطالب على المنصة الإلكترونية
•  إتمام الطفل سن 4 سنوات في يوم 1 أكتوبر

ملحوظة: يتم اختيار الطالب الأكبر سنًا والأقرب للسكن

•  تقديم أوراق الطفل في فرع واحد فقط، وعند التقديم في أكثر من فرع بيتم رفض الطلب
• أن تكون جميع البيانات المذكورة صحيحة؛ فلا توجد أي فرصة لتعديلها بعد التقديم

يجب على ولي الأمر بعد تقديم ملف الطالب متابعة البريد الالكتروني الخاص بيه؛ لإن المدرسة بتبعت عليه أي مستجدات خاصة بالتقديم أو بالطفل بوجه عام.

المدارس المصرية اليابانية بتحرص إن المدرسين الموجودين فيها يكون عندهم كفاءة كافية للتعامل مع الطفل وشرح المناهج بطريقة تناسبه فبنلاقي إنها كمان بتضع شروط لالتحاق المدرسين بيها، ومنها:

• أن يكون المدرس في سن الشباب؛ لإن بيكون عنده وعي أكبر عن استخدام التكنولوجيا وطرق التعليم الحديثة
• التسجيل على منصة التقدم الالكترونية
  دخول الامتحانات المطلوبة واجتيازها؛ لإنها بتقيس مدى قدرة المدرس على التعامل مع الأطفال وبتوضح جوانب مهمة في شخصيته.
• إجراء مقابلة شخصية مع أشخاص متخصصين

ملحوظة: بيتم اختيار المدرسين الحاصلين على أعلى الدرجات في الامتحانات وقبولهم في المدرسة بعد إجراء المقابلة الشخصية.

4. مناهج المدارس اليابانية

المدارس المصرية اليابانية بوزارة التربية والتعليم بتقدم نفس المناهج المصرية؛ لإنها في الأصل مدرسة رسمية -حكومية-، ولكن الاختلاف يكمن في طريقة تدريس تلك المناهج، وتطبيق أنشطة التوكاتسو بالمدرسة.

لمعلوماتك، أنشطة التوكاتسو هي مجموعة أنشطة مختلفة بتتم ممارستها داخل المدرسة وبيتم من خلالها تشكيل وعي الطفل، وتعليمه المبادئ السليمة، والأنشطة دي مش موجودة في باقي المدارس الرسمية في مصر.

طريقة تدريس مناهج المدارس اليابانية قائمة على المناقشة والحوار، بمعنى إن مدرس الفصل بيطرح سؤال معين ويطلب من الطلبة إبداء رأيهم فيه والمناقشة فيما بينهم، ودور المدرس هنا بيكون تنظيم المناقشة دي وسماع الآراء المختلفة.

تدريس المناهج بالطريقة دي بيكسب الطفل العديد من المهارات، فبنلاحظ إن ثقة الطفل في نفسه بتزيد، وبيكون قادر على التعبير عن رأيه بدون خوف ومناقشة باقي الآراء المختلفة وتقبلها.

5. مميزات المدارس اليابانية في مصر

المدارس المصرية اليابانية بتتميز عن باقي المدارس الرسمية بأكثر من نقطة، ودا بيزود عدد المقبلين عليها كل سنة.
من أهم المميزات الموجودة في المدارس دي بنلاقي:

تطبيق نظام تعليمي حديث داخل المدارس الحكومية

المدارس المصرية اليابانية بتواكب التطورات اللي بتحصل كل يوم، فبتحرص على تقديم نموذج تعليمي فريد وتطبيقه بأحدث الطرق التعليمية الموجودة؛ عشان تخرج طالب إيجابي سوي قادر على فهم اللي بيدور حواليه بسهولة ومتقبل اختلاف الرأي.

النظام التعليمي قائم على مشاركة الطفل في العديد من الأنشطة اللي بتساعد في بناء شخصيته وتطوير مهاراته، بالإضافة إلى الاهتمام بشكل كبير بتربية الطفل وزرع القيم السامية.
مصاريف المدرسة المصرية اليابانية متوسطة
ولي الأمر دايما بيحرص على حصول طفله على أفضل المناهج التعليمية زي الموجودة في المدارس الانترناشونال في مصر، ولكن مع ارتفاع مصاريف المدارس دي بيلجأ أحيانا للمدارس الرسمية، ووقتها الطالب مش بيحصل على تعليم بالجودة المطلوبة.

المدارس اليابانية بتعتبر بديل أمثل للمدارس الانترناشونال؛ ودا لإنها بتقدم خدمة تعليمية مميزة وبأسعار أقل بكتير من الأسعار المطلوبة في المدارس الانترناشونال، وبالتالي بتكون مناسبة لمتوسطي الدخل من أولياء الأمور وبتخفف الضغط عليهم.

وجود عدد محدود من الطلبة في الفصول

المدارس اليابانية بتحرص على عدم تكدس الطفلة في الفصول؛ عشان توفر لكل طالب فرصة المشاركة والتعبير عن رأيه، وبالتالي بنلاقي إن أعداد الطلبة في الفصول بتتراوح بين 37 – 40 طالب، وحجم الفصل كمان بيكون كبير، ودا عدد قليل مقارنة بالأعداد الموجودة في فصول باقي المدارس الرسمية.

الاهتمام باستفسارات وشكاوى ولي الأمر

شكاوى أولياء الأمور وملاحظاتهم هما اللي بيساعدوا المدارس إنها تتطور، وبالتالي بنلاحظ حرص المدارس المصرية اليابانية على استقبال الملاحظات دي باستمرار عن طريق كراسة الارشادات اللي بتكون مع الطفل بشكل مستمر، وولي الأمر بيقدر يسجل فيها أي شيء حابب يوصله للمدرسة.

عدم إجبار ولي الأمر على شراء زي مدرسي كل عام

شراء الزي المدرسي في المدارس اليابانية بيكون إجباري في بداية كل مرحلة فقط، أما في باقي السنوات فمش بيكون في ضغط من المدرسة على ولي الأمر لتحمل مصاريف إضافية وشراء زي معين، ودا بيخفف أيضا ضغط المصاريف على أولياء الأمور.

6. عيوب المدارس اليابانية في مصر

مع تطبيق نظام تعليمي مختلف في طريقة تدريسه ظهرت بعض العيوب في المدارس المصرية اليابانية بوزارة التربية والتعليم، والعيوب دي لازم ولي الأمر يعرفها كويس قبل التقديم لطفله ويوازن بينها وبين المميزات؛ عشان يحدد هل المدارس دي مناسبة لطفله ولا في بديل أفضل منها.

من أشهر عيوب المدارس دي:

طول اليوم الدراسي

اليوم الدراسي في المدارس المصرية اليابانية بوزارة التربية والتعليم بيبدأ من الساعة 7.5 صباحا وبيستمر إلى الساعة 3 عصرًا، والوقت دا بيكون طويل إلى حد ما على الطفل ومش بيكون قادر يركز كل الساعات دي، وبالتالي أولياء الأمور بيعتبروا النقطة دي أحد عيوب المدارس اليابانية.

لكن من وجة نظر تانية بنلاقي إن طول اليوم الدراسي بيعطي فرصة أكبر للمدرس إنه يشرح المادة العلمية بشكل كويس ويطبق الطرق التعليمية الحديثة، وكمان بيكون في عدد كبير من الأنشطة اللي بتتم ممارستها على مدار اليوم، فالطفل مش بيشعر بطول اليوم الدراسي في المدارس دي.

عدم وجود فرصة لتعلم لغات مختلفة

المدارس المصرية اليابانية بتهتم بتدريس اللغة العربية واللغة الانجليزية، والطالب بيقدر يتقنهم على مدار دراسته، لكن مش بيكون في فرصة لتعلم لغات تانية زي الألمانية والفرنسية وغيرهم؛ لإن المدرسة في الأصل هي مدرسة حكومية، وتدريس اللغات المختلفة بيكون متاح في المدارس الانترناشونال.

7. قائمة بالمدارس اليابانية المصرية بوزارة التربية والتعليم

فروع المدارس المصرية اليابانية منتشرة في كل أنحاء مصر، أهمهم في القاهرة:

• المدرسة المصرية اليابانية الشروق 1 – Egyptian Japanese School Elsherouk 1 – EJS
• المدرسة المصرية اليابانية الشروق 2 – Egyptian Japanese School Elsherouk 2 – EJS
• المدرسة المصرية اليابانية بالعبور – Egyptian Japanese School Obour City – EJS
• المدرسة المصرية اليابانية القاهرة الجديدة – Egyptian Japanese School New Cairo – EJS
• المدرسة المصرية اليابانية زهراء مدينة نصر – Egyptian Japanese School Nacr City – EJSممكن تتعرف على كل فروع المدارس المصرية اليابانية من هنا.

8. تجربة المدارس المصرية اليابانية بوزارة التربية والتعليم حتى 2021

المدارس المصرية اليابانية بوزارة التربية والتعليم بتقدم تجربة تعليمية مميزة من بداية تطبيقها في مصر سنة 2018 إلى الآن، والتجربة دي بتطبق نظام التعليم الياباني في المدارس المصرية، فبتهتم بتطوير الطفل في جميع الجوانب الحياتية بجانب الاهتمام برفع مستواه الدراسي أثناء فترة وجوده بالمدرسة.

المدارس دي بتحرص على رفع المستوى الأخلاقي للطلبة، وبتقدم مبادرات في التربية تساعد على تكوين شخصية فريدة قادرة على التأثير بشكل إيجابي في العالم اللي حواليها.

من هنا بيتضح إن اختيار مدرسة يابانية للطفل في 2021 هيكون قرار صائب بيوفر مستوى تعليمي عالي الجودة للطفل وبيهتم بأخلاقه، وكمان بيساعده على التفوق والوصول لهدفه.

9. مستقبل المدارس اليابانية في مصر

المدارس المصرية اليابانية بوزارة التربية والتعليم بدأت من حوالي 3 سنوات فقط زي ما ذكرنا، وحتى الأن المدارس دي بتقدم نموذج تعليمي راقي بيجذب أولياء الأمور إنهم يقدموا لأولادهم فيه.

المدارس دي هيكون لها مستقبل باهر في حالة استمرارها في تطبيق النظام التعليمي دا بالجودة الموجودة الآن، وكمان في حالة استمرار الدولة في حرصها على تطبيق النظام بأفضل شكل ممكن؛ عشان يساعد الطالب على تنمية جوانب شخصيته، وتطوير مهاراته المختلفة.

الخلاصة

المدارس المصرية اليابانية بوزارة التربية والتعليم هي مدارس حكومية بتدرس المناهج المصرية بالطريقة اليابانية، والنظام قائم على تطبيق أنشطة التوكاتسو ومشاركة الطالب برأيه، ودا بيساعد بشكل كبير في تكوين شخص سوي قادر على القيادة وتقبل الآراء المختلفة.

المدارس دي بتضع شروط لالتحاق الطالب بيها زي تقديم جميع الأوراق المطلوبة في فرع واحد فقط، وإن الطفل يكون أتم عمر 4 سنوات، بالإضافة إلى إن جميع المعلومات المذكورة تكون صحيحة.

حرص المدارس على تقديم نموذج تعليمي فريد بيظهر وقت اختيارها للمدرسين، فبنلاقي المدارس بتضع عدة شروط لازم تتوافر في المدرس عشان يتم قبوله زي إنه يكون في مرحلة الشباب، وإنه يجتاز جميع الامتحانات، وغيرهم زي ما ذكرنا.

وأخيرًا، المدارس المصرية اليابانية لها العديد من المميزات اللي مش موجودة في باقي المدارس الرسمية، وعلى الجانب الآخر بنلاقي بعض العيوب، وبالتالي لازم نوازن بين المميزات والعيوب قبل التقديم للطفل في المدارس دي؛ عشان نضمن إنها مناسبة له.