انتشر في الفترة الأخيرة التنمر بين الأطفال، وبنلاقيه موجود بصورة مبالغ فيها سواء داخل المدارس أو خارجها، ووفقًا لإحصائية اليونيسف فحوالي 70% من طلاب المدارس بيتعرضوا لنوع من أنواع التنمر.
ودا طبعًا بيأثر على شخصيتهم وحالتهم النفسية سواء كانوا متنمر عليهم أو متنمرين، وبالتالي بيبدأ الأهل يدوروا على أسباب التنمر عند الأطفال.
عشان كدا هنوضح من خلال المقال تفاصيل أسباب ظهور التنمر بين الأطفال، وإزاي تكتشف تعرض طفلك للتنمر، وتساعده على التعامل بطريقة صحيحة.
تعريف التنمر بين الأطفال
قبل ما نعرف أسباب التنمر عند الأطفال، خلينا نعرف التنمر الأول، وهو سلوك متعمد ومتكرر بهدف إيذاء طفل تاني، سواء إيذاء جسدي أو عاطفي، وبالطبع بتتفاوت القوة بين الطفل المُتنمِر والمتنمَر عليه.
وتبعًا لدراسات المركز الوطني لإحصاءات التعليم -NCES بنلاقي إن حوالي 22% من الطلاب اللي بتتراوح أعمارهم بين 18:12 سنة ييتعرضوا للتنمر في جميع أنحاء العالم.
ووجدت الدراسة إن من أشكال التنمر اللي اتكلم عنها الطلاب كانت نشر شائعة عنهم غير حقيقية، أو تدمير أدواتهم، ومنهم ذكر تعرضه للشتائم، أو السخرية، أو الإهانة، وكمان في منهم اتعرض للتهديد بالأذى.
وذكر المركز الوطني إن التنمر بيختلف حسب الجنس، فالبنات بتتعرض للتنمر أكتر من الولاد.
أنواع التنمر بين الأطفال
وحسب تصنيف اليونيسيف في 5 أشكال مختلفة للتنمر، وهما:
1- تنمر لفظي
التنمر هنا بيكون باستخدام عبارات مسيئة للطفل، والسخرية منه وتهديده، أو النداء عليه بطريقة مضحكة ومستفزة، أو إطلاق الألقاب السيئة عليه عشان الكل يسخر منه.
2- تنمر جسدي
النوع دا من التنمر بين الأطفال بيشمل ضرب الطفل، أو سرقة حاجته أو حتى تكسيرها، والضرب هنا ممكن يكون خفيف أو شديد، وبالتالي ممكن يتسبب في مشاكل جسدية للطفل بجانب الإيذاء النفسي.
3- تنمر اجتماعي
التنمر الاجتماعي بيستهدف التأثير على علاقة الطفل مع باقي الناس حواليه، وهنا بيحاول المتنمر يدمر علاقات الطفل مع أصحابه، أو يشوه سمعته، وينشر الشائعات السلبية عنه.
4- تنمر نفسي
التنمر النفسي بيكون متعلق بالتلاعب بالطفل نفسيًا، وبيحاول يفقده ثقته بنفسه من خلال التنمر على مظهره، أو النظر إليه بشكل سيئ يضايقه، ودا بيسبب له أمراض واضطرابات نفسية.
5- تنمر إلكتروني
التنمر الإلكتروني هو واحد من أبرز أنواع التنمر الموجودة حاليًا، بالذات مع وجود التليفونات والأجهزة الإلكترونية بدون رقابة من الأهل.
وبنلاقي كتير من مستخدمين الإنترنت بيتم نقدهم بشكل سلبي، والتنمر عليهم سواء من أشخاص غربية أو نارس عارفينهم، وبيكون فيه سخرية من الشخص بطريقة صعبة جدًا وجارحة للطفل.
أسباب التنمر عند الأطفال
معرفة الأسباب اللي خلت الطفل متنمر هي عامل أساسي للوصول للعلاج الصحيح، عشان نقدر نعالج المشكلة صح من جذورها، ومن الأسباب دي بنلاقي:
1- مشاهد العنف في وسائل الإعلام
كل مشهد عنف بيشوفه الطفل حتى لو كان عابر بيوصل له رسالة سلبية، كإنه بيقنعه إن الاعتداء على غيرنا مقبول، ومع تكرار المشاهد بيبدأ الطفل يتعود عليها، وبيسعى مع الوقت لتطبيقها بصورة غلط.
عشان كدا لازم الأهل يخلوا بالهم من المحتوى اللي الطفل بيتعرض له، ويتابعوا طفلهم دايمًا، ويفهموه الصح من الغلط، وإن التنمر فعل سلبي وغير مقبول.
2- قلة الاهتمام بالطفل
من أسباب التنمر عند الأطفال هي قلة الاهتمام من الأهل، وشعور الطفل بالإهمال، فبيبدأ يحس بالضعف، عشان كدا بيعوض دا بفعل سلوكيات غريبة.
ودا بيوصله للتنمر على غيره من الأطفال، فيتسلط عليه الضوء، وياخد الاهتمام حتى لو كان بشكل سلبي، وبالتالي التنمر بالنسبة له وسيلة سهلة للفت الأنظار، ونتيجتها فعّالة.
وممكن التنمر يبقي طريقته للشعور بالقوة والسيطرة من خلال ممارسته ليه على أطفال تانين أقل منه في القوة.
3- المشاكل العائلية
أسباب التنمر عند الأطفال ممكن تبدأ من أسرة الطفل المُتنمِر، فنلاقي حد من أخواته بيتنمر عليه وعلى تصرفاته وشكله، أو حد من الأهل بيتنمر على طرف تاني قدامه.
وبالتالي الطفل هيكتسب العادة السيئة دي، ويمارسها على الأطفال الأضعف منه، وممكن يعتمدها كوسيلة سهلة وفعّالة لتفريغ غضبه.
4- ضعف تقدير الذات
في بعض الأحيان لو ركزنا على أسباب التنمر عند الأطفال هنلاقي إن الطفل المُتنمر عنده مشاكل في تقديره لذاته، وكمحاولة منه للإحساس بإنه قوي وشجاع بيميل لإيذاء غيره،
ودا بيديه شعور القوة والسيطرة على غيره، ولكنه شعور مؤقت ليه وقت محدد وينتهي، وبيرجع يحس تاني بشعور سيئ.
5- تأثير الأصدقاء
من أقوى أسباب التنمر عند الأطفال هو تأثير أصدقائهم، فلو أصدقاء الطفل متنمرين غالبًا هيكتسب نفس الصفة، لإن الطفل بيسعى إنه يكون محبوب ومقبول من اللي حواليه.
فحتى لو رافض فكرة التنمر لكن أصدقائه المحيطين بيمارسوه فممكن يتنمر معاهم، عشان يفضل يحس بشعور القبول، وإنه فرد من مجموعة، وليه انتماء.
6- الغيرة من الآخرين
من أهم أسباب التنمر عند الأطفال شعورهم بالغيرة أو الإحباط، لإن بعض الأطفال لما بيلاقوا طفل تاني متفوق، وحقق إنجاز في أي مجال بيحسوا بالإحباط إنهم ما قدروش يحققوا نجاح زيه.
خاصةً لو الأهل بيقارنوا طفلهم بغيره دايمًا، فبيتولد عند الطفل مشاعر غيرة، وبيعبر عنها بالاعتداء على الطفل التاني المتفوق.
عشان كدا لازم الأهل يمنعوا أسلوب مقارنة طفلهم بغيره، ويوضحوا إن كل إنسان عنده مهارات وقدرات مختلفة، ويعلموا الطفل يحب نفسه، ويتقبلها.
7- فقدان المهارات الاجتماعية
لما الطفل بيفقد المهارات الاجتماعية الأساسية زي القدرة على التواصل والتعاطف مع الغير بيتصرف بشكل غير لائق، وبيفقد إحساسه تجاه الآخرين، فيبدأ يتنمر عليهم، بدون اهتمام بالأثر المترتب على تصرفاته.
دا بالنسبة للطفل المتنمر، لكن لو طفلك بقى هو اللي بيقابل التنمر دا هتعرف ازاي؟
علامات تبيِّن تعرض الطفل للتنمر
التنمر بيصنَّف كسلوك عدواني له آثار سلبية كبيرة، وبيعمل مشاكل مستمرة للطفل المتنمَر عليه، وذكرت المنظمة بعض العلامات اللي بتبين مواجهة طفلك للتنمر وتعرضه للمشاكل، أبرزها:
- ضياع أدواته المدرسية بشكل مستمر، أو تعرضها للكسر والتلف.
- التبول اللاإرادي، وبيكون شائع أكتر في الأطفال الأصغر سنًا.
- الشكوى من الصداع، أو المغص، ووجود أعراض أخرى جانبية.
- ظهور جروح وكدمات نتيجة التعرض للتنمر الجسدي.
- التدني في المستوى الدراسي بشكل ملحوظ.
- عدم وجود علاقات اجتماعية، أو أصدقاء له.
- الأرق، ومعاناته من الكوابيس.
- الضعف في الأداء الدراسي.
- التأتأة وصعوبة الكلام.
- رفض الذهاب للمدرسة.
- الإصابة بنوبات هلع.
- العصبية الشديد.
- الحزن والاكتئاب.
- القلق المستمر.
كل دي تصرفات بتظهر على الطفل اللي بيتعرض للتنمر، وممكن الأهل ياخدوها كعلامات تحذيرية، عشان ينتبهوا لطفلهم، ويتأكدوا إذا كان بيتعرض للتنمر أو بيواجه مشاكل تانية.
ماذا لو طفلك نفسه متنمر؟
بعد ما عرفنا أسباب التنمر عند الأطفال، مهم نفهم إن مش بس الطفل اللي بيتعرض للتنمر بيحتاج للمساعدة، لكن كمان المتنمر نفسه بيكون محتاج للاهتمام لتصحيح سلوكه.
وفي 8 خطوات تقدر تتبعها إذا اكتشفت إن طفلك هو المتنمر، وهي:
1- تواصل مع الطفل
لما تبدأ تلاحظ سلوك غريب لطفلك لازم تواجه الموضوع، وتتكلم معاه بود، وتتفهم السبب وراء سلوكه، وتقبل الموضوع عشان تقدر تتصرف بطريقة صحيحة، ويثق فيك وفي الكلام معاك بدون خوف.
2- اغرس السلوك الجيد
لازم تغرس في طفلك المشاعر والتعامل اللطيف مع الآخرين، وكمان تعلمه حدود تصرفاته بحرية، والفرق بين الحاجات اللي تخصه واللي تخص غيره، ودا يخلينا نتفادى من الأساس أسباب التنمر عند الأطفال.
لإن الطفل بيكون قادر يستوعب فكرة التعامل بطريقة كويسة مع الآخرين، ويتعاطف مع اللي قدامه، ودا بيخليه ما يفكرش يؤذي غيره.
3- اعكس الأدوار
خلي طفلك يشوف نتيجة التنمر إذا قلبنا الأدوار واتقال ليه الكلام دا، أو حد عمل معاه التصرف، واسأله هيحس بإيه.
خليه يعبر عن مشاعره، وفهمه إن دا بيكون إحساس الطفل التاني نتيجة تنمره عليه.
4- حلل أساس السلوك
مهم تراقب طريقة كلام المحيطين بالطفل وتصرفاتهم معاه، لإن ممكن يكونوا بيمارسوا معاه التنمر، وبالتالي بيحفزوا عنده التصرفات السيئة، أو بيتنمر كنوع من المواجهة.
ومهم وقتها تساعده يحكيلك اللي بيحصل عشان تقدر توجهه وتعدل سلوكه، وتوقف الشخص اللي بيتنمر عليه، ودا بيقلل من وجود أسباب التنمر عند الأطفال، وبيساعد في حل المشكلة من جذورها.
5- عاقب بعدل
لازم الطفل يحس إن فيه عقاب للسلوك السيئ وأفعاله الخاطئة، لكن بشكل عادل بدون حدة، زي إنك تحرمه من حاجه بيحبها، عشان يحسن من تصرفاته.
اقرأ أيضًا: 7 أضرار ضرب الطفل في عمر الثلاث سنوات وطرق العقاب البديلة
6- علمه يعتذر
تعليم طفلك ثقافة الاعتذار قدام الكل لما يغلط، ويقول لطفل تاني إنه آسف بيعرفه قد إيه غلطه كبير، وغالبًا مش هيكرر التنمر تاني عليه، علشان ما يتعرضش للموقف دا تاني قدام حد.
7- دعم التأديب المدرسي
التواصل الفعال بينك وبين المدرسة، ومشاركتك للمدرس في تأديب الطفل بيساعدك على مراقبة تصرفاته، وتغيير سلوكه التنمري على أصحابه.
8- استشير متخصص
دور الإخصائي النفسي هو تشخيص وتحديد أسباب التنمر عند الأطفال، لمساعدتهم على تخطي المشكلة، خاصة إن كتير من أولياء الأمور مش بيقدروا يحددوا السبب، أو يسيطروا على تنمر طفلهم.
وهنا بيكون ضروري تعرض طفلك على متخصص عشان يساعد طفلك على فهم يغير من نفسه، ويتشجع يكون أحسن.
كيف تساعد طفلك على مواجهة التنمر؟
تجاهل الأهل لمشكلة التنمر وإهمالهم لمعالجة أضرارها هيأثر على حاضر الطفل ومستقبله، عشان كدا لازم يدركوا خطورة المشكلة، ويبحثوا عن الطرق الصحيحة للتعامل مع الطفل.
ومن أهم النصائح اللي هتساعدك:
1- ثقّف طفلك عن التنمر
في أطفال كتير مش بتكون قادرة تحدد إن اللي بتتعرض ليه تنمر ولا لأ، عشان كدا لازم نعرف أطفالنا معنى التنمر، ونحاول نوصل المعلومة بشكل مبسط حسب عمرهم، فيقدر يشتكي من الطفل لما يتنمر عليه.
وتبعًا لإحصائية المركز الوطني لإحصاءات التعليم – NCES في عام 2019، حوالي 22% من الطلاب تعرضوا للتنمر بالمدرسة، وكانت بتتراوح أعمارهم بين 18:12 سنة.
لكن الإيجابي في الموضوع إن النسبة قلت عن سنة 2009 -اللي كانت 28%-، ودا راجع للتوعية والتثقيف اللي حصل للطلاب والأهل عن التنمر، وتوضيح الأذى النفسي اللي بيحصل للمتنمر عليه.
2- عزز ثقة الطفل بنفسه
من المهم تعزيز الثقة بالنفس عند الطفل المُتنمر والطفل اللي بيتم التنمر عليه، ودا من خلال معرفته بنقاط قوته، وازاي يستغلها صح، ومعرفة بنقاط ضعفه، وازاي يحسّنها.
كمان بيفضل تعليم الطفل نوع من أنواع الرياضات الدفاعية، لإنها هتعزز ثقته بنفسه، وهتكون فرصة كويسة يفرغ فيها طاقته بشكل إيجابي.
3- حسن علاقتك بطفلك
كل ما كانت العلاقة بين الطفل وأهله فيها حب وحنان واهتمام، وفي تواصل فعال بينهم كانت صحته النفسية أفضل، وبالتالي هيمتنع عن ممارسة التنمر على غيره.
ولو وقع ضحية ليه هيقدر يعبر لأهله عن اللي بيحصل معاه بشكل أفضل، وهو متأكد من معالجتهم للموضوع.
4- علم طفلك يكون إيجابي
خلي طفلك لما يشوف غيره بيتنمر على حد يدافع عنه يحاول يفهم المتنمر غلطه بهدوء، ودا بيمنعه من تقبل التنمر وأي سلوك خاطئ بيشوفه، ويقدر يدافع عن نفسه بعد كدا.
ولو حابب تعرف أكتر عن مساعدة طفلك في التعامل مع التنمر، وأساس أسباب التنمر عند الأطفال، تقدر تقرأ معاه مجلة اليونيسيف أنا ضد التنمر، اللي هتساعده بطريقة سهلة يعرف طرق الدفاع عن نفسه.
5- علم الطفل الدفاع عن نفسه
مهم جدًا إن الطفل يتعلم ازاي يدافع عن نفسه، وما يخليش حد يعتدي عليه أو على حاجته، ويعرف يعمل كدا بدون ما يتجاوز الحد أو يتحول لشخص مؤذي، ويكون هادي وحازم في نفس الوقت.
وهيساعد في كدا كمان إننا نسمع اقتراحات الطفل، ونخليه يشارك بالحلول اللي شايفها مناسبة، ونعلمه طرق التواصل بشكل سليم، وكمان نعرفه امتى يطلب مساعدتك، أو مساعدة المدرس.
6- خليك قدوة لطفلك
زي ما وضحنا قبل كدا إن من أسباب التنمر عند الأطفال هي وجود سلوك التنمر بين الأهل، عشان كدا مهم طفلك يشوفك كقدوة ليه في التصرفات اللي بتطلب منه ينفذها، بالذات المتعلقة بالتنمر.
ومهم تاخد بالك من عدم التريقة على حد أو ممارسة التنمر عليه شخصيًا، حتى لو بضحك، لإنه كدا مش هيفهم الفرق بين كلامك وتصرفاتك المتناقضة، وهيبدأ يقلدك.
7- استعن باختصاصي نفسي
زي ما شوفنا، أسباب التنمر عند الأطفال متفاوتة، وأوقات بيكون الأثر النفسي للتنمر كبير، وبيسبب مشاكل اجتماعية أو صحية، وهنا بيحتاج الطفل للتدخل الطبي من متخصص يقدر يوجه بشكل صحيح.
وكمان يساعده يتخطى الأثر السلبي اللي سببه التنمر عليه، ويعبر عن اللي بيتعرض له، وكمان يوضح للأهل خطة العلاج النفسي المناسب للطفل، وطرق التعامل معاه.
الخلاصة
عشان تقدر تحدد أضرار وأسباب التنمر عند الأطفال، لازم تراقب تصرفاتهم كويس داخل البيت وبالمدرسة، وكمان تهتم بيهم، وتراعيهم بالشكل اللي يناسبهم، ويخلي عندهم ثقة بالنفس.
ودا بيخلي الأهل قادرين يتغلبوا على مشكلة التنمر، ويحلوها من جذورها، ويعززوا السلوكيات الجيدة اللي تساعده يوقف تنمر على غيره، أو يستعينوا بمتخصص عند اللزوم لعلاج المشاكل النفسية.
ومن المهم تعليم الطفل المتنمر عليه طرق الدفاع عن النفس، وإنه ضروري يعبر عن أي أذي بيتعرض ليه، عشان نقدر ننشئ جيل عند وعي تجاه نفسه واللي حواليه.
أضف تعليق