أهم 9 معلومات عن امتحان ACT

معلومات عن امتحان ACT

 

الاختبارات النهائية اللي بيتم إجراؤها في المدارس الثانوية وبتشرف عليها وزارة التربية والتعليم في مصر مش بتكون كافية لوحدها إنها تبين مدى استعداد الطالب لاستكمال دراسته في الجامعات الخارجية، هي بس بتتيح له فرصة الالتحاق بالجامعات المصرية.

بالتالي بنلاقي إن الطالب اللي حابب يكمل دراسته الجامعية برا مصر لازم يدخل امتحان تأهيلي معين زي امتحان ACT أو السات الأمريكي قبل ما يقدم في الجامعة.

شهادة امتحان ACT مطلوبة أكثر من شهادة السات في الجامعات التركية، وكمان بتطلبها بعض الجامعات في أمريكا، وبنلاحظ إن الامتحان دا بيتميز عن امتحان السات في أكثر من نقطة زي إنه بيكون اجتيازه أسهل، والتحضير له كمان بيكون أسهل، وغيرهم.

وعشان أهمية امتحان ACT فهنتكلم عنه في المقال دا بالتفصيل ونعرض أهم المعلومات اللي بيكون محتاجها الطالب قبل دخول الامتحان.

1_ ماهو امتحان ACT

امتحان ACT هو اختبار الجامعات الأمريكية –American College Test-، ودا امتحان الكتروني منافس لامتحان السات الأمريكي بيختبر الطلبة في الأجزاء اللي درسوها قبل كده، وبيأهلهم للالتحاق بعدد كبير من الجامعات الأمريكية وبعض الجامعات التانية حول العالم.

الامتحان بيختبر كذا مهارة عند الطالب، وبيشمل العديد من الأقسام اللي بتبين فعلا مدى استيعابه للمعلومات اللي درستها في السنوات الأخيرة، وإزاي بيقدر يستغل المعلومات دي فإنه يوصل للحل الصحيح للسؤال خلال وقت محدود جدًا أثناء الامتحان.

امتحان ACT بيكون باللغة الانجليزية فقط، والهيئة المسؤولة عن الامتحان هي هيئة ACT، ودي منظمة غير ربحية بتشرف بشكل كامل على إجرائه سواء في مصر أو في أي دولة تانية.

بعض الطلبة وأولياء الأمور بيسألوا عن الشروط المطلوبة للتسجيل في امتحان ACT، وهنوصل لإجابة السؤال دا حالًا.

2_ هل توجد شروط للتسجيل في امتحان ACT؟

امتحان ACT مش بيكون له شروط محددة للتسجيل فيه، يعني أي طالب حابب يكمل دراسته الجامعية في أي جامعة خارجية حول العالم بتطلب الامتحان دا يقدر يسجل فيه ويدخله بسهولة، وفي حالة اجتيازه الامتحان بيحصل على شهادة معتمدة دوليًا وعالميًا.

الامتحان في الأصل موجه لطلبة الدبلومة الأمريكية، والطلبة دي في الغالب بتكون متقنة اللغة الانجليزية؛ لإن دي اللغة اللي بيدرسوا بيها المناهج كل سنه، فبالتالي لغة امتحان ACT بتكون سهلة بالنسبة لهم، أما طلبة المدارس الرسمية فالأمر ممكن يكون صعب عليهم.

عشان كده يفضل إن الطالب اللي بيسجل في امتحان ACT يكون متقن اللغة الانجليزية؛ عشان يقدر يستوعب أسئلة الامتحان كويس وبالتالي يوصل لحلها بسهولة، ولكن دا مش شرط من شروط التسجيل فيه.

3_ أقسام امتحان ACT

أقسام امتحان ACT

امتحان الـ ACT بيتكون من 4 أجزاء رئيسية بالإضافة إلى جزء اختياري، والأجزاء دي بتختلف عن امتحان السات الأمريكي، وهي كالآتى:

اللغة الانجليزية

قسم اللغة الانجليزية هو أول قسم في امتحان الـ ACT وبيكون عبارة عن مجموعة من النصوص وعليهم 75 سؤال اختيار من متعدد، والأسئلة دي بتقيس مستوى الطالب في تكوين الجمل بطريقة صحيحة بدون ما يكون عنده أخطاء نحوية أو أخطاء في الأسلوب.

المدة اللي بيمتحن فيها الطالب القسم دا من الامتحان بتكون 45 دقيقة فقط من الوقت الكلي.

الرياضيات

قسم الرياضيات بيعتبر من أهم الأقسام الموجودة في امتحان ACT؛ لانه بيقيس سرعة البديهة عند الطالب وبيبين مدى قدرته على التعامل مع المشكلات وإيجاد حلول صحيحة بشكل سريع بناء على المعلومات اللي درسها في المرحلة الثانوية.

القسم دا بيتكون من 60 سؤال شامل الجبر والهندسة وحساب المثلثات، وبيكون مطلوب حل الأسئلة خلال 60 دقيقة فقط، وبالتالي فهي كمان بتقيس مدى قدرة الطالب على التفكير والتعامل تحت ضغط.

القراءة

قسم القراءة هو القسم الثالث في اختبار ACT، والقسم دا هدفه يحدد مدى فهم الطالب للفقرات ومعرفته لمعانيها الأساسية، وبيكون مطلوب تحديد الأفكار الرئيسية للفقرات دي، والقسم دا بيوضح إذا كان الطالب متقن للغة الإنجليزية ولا لأ.

بنلاحظ إن قسم القراءة مكون من 40 سؤال، والطالب بيحل جميع الأسئلة خلال 35 دقيقة.

العلوم

قسم العلوم في امتحان ACT بيتكون من أكثر من جزء، والأسئلة الموجودة فيه فكرتها بتقوم على قياس قدرة الطالب على التحليل وإيجاد حلول للمشكلات، والأسئلة دي بتكون متعلقة بالعلوم الطبيعية المختلفة اللي الطالب درسها أثناء تواجده بالمدرسة.

الامتحان هنا مكون من 35 سؤال ومدته 40 دقيقة.

المقال

المقال هو الجزء الاختياري الوحيد في امتحان ACT، بمعنى إن الطالب ممكن يمتنع عن دخول الجزء دا من الامتحان لو مش حابب يدخله، وكمان مش بيكون عليه درجات في المجموع النهائي.

ملحوظة: جميع الاسئلة الموجودة في امتحان الـ ACT هي أسئلة اختيار من متعدد -MCQ-.

4_ كيفية التدريب على امتحان ACT

التدريب بشكل كويس على الامتحانات والتجهيز لها قبل موعدها هو شيء أساسي بالنسبة لأي امتحان وخصوصًا الامتحانات التأهيلية؛ لإن التدريب دا بيساعد الطالب إنه يفهم المادة العلمية كويس ويستعد لأي سؤال فيها.

من أهم النصائح اللي هتساعد الطالب في الحصول على درجات مرتفعة في امتحان الـ ACT:

بدء المذاكرة قبل الامتحان بفترة كافية

الاستعداد للامتحان قبل ميعاده بفترة كافية هيعطي للطالب فرصة أكبر لمراجعة كل المعلومات اللي محتاجها، وهيقلل الضغط النفسي اللي ممكن يحصله في الفترة دي.

بالتالي دا هيساعده ينجز أكثر ويجتاز الامتحان بسهولة ومنه يحصل على الدرجات اللي تأهله لدخول الكلية اللي حابب يكمل دراسته فيها.

حل أسئلة الامتحانات السابقة من الموقع الرسمي

الموقع الرسمي لامتحان الـ ACT بيوفر مجموعة كبيرة من أسئلة الامتحانات السابقة اللي بتختلف في مستويات الصعوبة، وبيوفر كمان حلول الأسئلة دي وطريقة الوصول للحل بالتفصيل، ومنها الطالب بيستوعب طريقة التفكير في السؤال والوصول لحله في وقت قصير.

الممارسة هنا هتخلي الطالب يتقن المواد العلمية ويفهم الطريقة اللي بيتحط على أساسها الامتحان، وبالتالي هيقدر يحل كويس في الامتحان النهائي.

التدريب على المهارات اللي يتطلبها الامتحان

أسئلة امتحان الـ ACT بتقيس عند الطالب مجموعة من المهارات المختلفة، فكل سؤال بيتطلب استخدام مهارة معينة للوصول إلى الحل الصحيح، ولو المهارة دي مش موجودة فالطالب هيواجه صعوبة في حل السؤال وهيضيع وقت كبير فيه، وفي النهاية ممكن ما يوصلش للإجابة الصحيحة أثناء الامتحان.

ومن هنا لازم الطالب يعرف إيه المهارة المطلوبة في كل سؤال؛ عشان يعرف يوصل للحل بسرعة، والنقطة دي هيكتسبها لما يحل أسئلة كتير خصوصا اسئلة الامتحانات السابقة.

التمعن في قراءة الأسئلة

دايما في المدارس بيقولوا إن فهم السؤال بيساوي نصف الإجابة، والمقولة دي صحيحة جدًا؛ لإن الفهم الصحيح لفكرة السؤال بيساعد في التوصل للحل بسهولة، وبالتالي لازم الطالب يعطي لنفسه وقت كافي لقراءة السؤال ويتجنب التسرع في الحل بدون فهم عشان يقدر يجاوب كويس ويجتاز الامتحان.

الرجوع إلى الأخطاء المتكررة

أثناء تدريب الطالب على أسئلة الامتحانات السابقة هيلاحظ إنه بيخطئ في حل مجموعة من الأسئلة دي، وممكن الأخطاء تكون متكررة، ودوره هنا إنه يجمع الأسئلة اللي أخطأ فيها ويحاول يفهم طريقة الحل ويرجع يحلها بنفسه تاني، وبالطريقة دي هيفهم الفكرة الموجودة في الأسئلة ومش هينساها أو يخطئ فيها تاني.

5_ الجامعات التي تشترط اجتياز امتحان ACT

الجامعات التي تشترط اجتياز امتحان ACT

عدد كبير من الجامعات حول العالم بيشترطوا على الطلبة إنهم يقدموا شهادة اجتياز امتحان ضمن أوراق الالتحاق بيها، ومش بيتم قبول الطالب اللي مش معاه الشهادة دي.

من أشهر الجامعات اللي بتتطلب شهادة ACT:

  1. جامعة جورج تاون Georgetown University
  2. جامعة سيراكيوز Seracuse University
  3. جامعة بنسلفانيا University of Pennsylvania
  4. جامعة جورج واشنطن George Washington
  5. جامعة تافتس Tufts University
  6. جامعة ييل Yale University
  7. جامعة رايس Rice University
  8. كلية بومونا Pomona College

6_ مواعيد التسجيل في امتحان ACT

امتحان الـ ACT بيتم إجراؤه في مصر 7 مرات على مدار السنة، وبالتالي بيكون مع الطالب فرصة للتسجيل في الامتحان ودخوله أكثر من مرة خلال السنة الواحدة، والمواعيد دي بتكون في شهور:

  • فبراير
  • أبريل
  • يونيو
  • يوليو
  • سبتمبر
  • أكتوبر
  • ديسمبر

باب التسجيل بيفتح دايما قبل ميعاد الامتحان بفترة كافية، والمواعيد دي بتختلف من وقت للتاني، فبنلاقي إن آخر وقت للتسجيل في الامتحان القادم كان ميعاده 14 يوليو لسنة 2021، وبالتالي لازم الطالب يتابع كويس جدا مواعيد التسجيل للامتحان عشان يكون مستعد لها، ويتابع القرارات الصادرة من وزارة التربية والتعليم المصرية بخصوص المواعيد.

7_ رسوم التسجيل في امتحان ACT

الرسوم المطلوبة وقت التسجيل في امتحان الـ ACT بيتم سدادها بالدولار؛ ودا لإن الامتحان أمريكي الأصل، وبنلاقي إن سعر امتحان ACT بيقترب من 55 دولار بدون المقال للطلبة الأمريكيين والكنديين.

أما بالنسبة للطلبة الدوليين فالرسوم بترتفع إلى 150 دولار بدون المقال، وفي حالة اختيار جزء المقال فالطالب بيدفع رسوم أكثر من القيمة دي.

ملحوظة: لو الطالب قرر إنه مش هيدخل الجزء المقالي من الامتحان وغير رأيه يوم الامتحان أو العكس بيضطر يسدد رسوم إضافية قيمتها حوالي 16 دولار أمريكي.

8_ الفرق بين SAT و ACT و EST

الفرق بين SAT و ACT و EST

الامتحانات التأهيلية للجامعات دايما بتختلف عن بعضها في كذا نقطة، والاختلاف دا ممكن يكون ميزة أو عيب في الامتحان، عشان كدا لازم نعرف الفروقات ما بينهم.

امتحان SAT

امتحان السات يعتبر أشهر امتحان تأهيلي للجامعات الأمريكية، وبيكون مطلوب في أغلب الجامعات هناك أكثر من ACT.
الامتحان بيتكون من أقسام مختلفة عن ACT وهي:

  • الرياضيات
  • القراءة
  • الكتابة واللغة
  • المقال

تم اعتماد السات في مصر لفترة طويلة، ولكن مؤخرا ظهرت بعض المشاكل فيه زي التسريب وإلغاء الامتحان أكثر من مرة، ومن هنا أصدرت وزارة التربية والتعليم في مصر قرار بإلغاء السات واستبداله بامتحان مصري تاني اسمه EST.

امتحان ACT

امتحان الـ ACT هو امتحان تابع لمؤسسة غير ربحية بيأهل لدخول عدد كبير من الجامعات زي ما وضحنا، وبيكون أسهل من السات، فرغم إن الوقت المحدد لكل سؤال بيكون قليل إلا إن الطالب مش بيواجه صعوبة كبيرة في الحل.

الامتحان دا كمان تم إلغاء اعتماده من مصر من فترة بسيطة، وأصبح امتحان EST هو امتحان الدبلومة الأمريكية الوحيد اللي بيأهل لدخول الجامعات المصرية.

امتحان EST

امتحان EST هو امتحان موجه لطلبة الدبلومة الأمريكية في مصر؛ عشان يكونوا مؤهلين لدخول الجامعات المصرية، والامتحان دا بيكون تحت إشراف وزارة التربية والتعليم المصرية بدون تدخل من المؤسسات الأمريكية، ودا ظهر بعد إلغاء اعتماد امتحان السات و ACT في مصر.

من خلال الشهادة اللي بيحصلوا عليها من الامتحان دا بيقدروا يلتحقوا بأي جامعة مصرية بس طبعًا بعد تحقيق باقي الشروط اللي بتطلبها الجامعة.

امتحان الـ EST بيشبه امتحان السات في التركيب لكن الجامعات الأمريكية مش معترفة به للأسف، وبالتالي لو الطالب حابب يكمل دراسته في الجامعات المصرية فبيكتفي باجتياز الامتحان دا بس، لكن لو حابب يدرس برا مصر فبيحتاج إنه يقدم على السات الأمريكي أو ACT حسب متطلبات الجامعة اللي هيقدم فيها.

9_ صلاحية امتحان ACT

شهادة امتحان الـ ACT بتمكن الطالب من دخول عدد كبير من الجامعات العالمية ولكن دا بيكون متاح خلال فترة معينة فقط، فبنلاقي إن صلاحية الشهادة بتكون لمدة 5 سنوات، وبعدها الطالب يقدر يسجل في الامتحان مرة تانية ويجدد الشهادة.

Share on facebook
Share on whatsapp
Share on telegram
Share on email

دليل المدارس المصرية

ابحث عن المدرسة واحصل علي أدق النتائج وكافة المعلومات.

ورك شيت للاطفال Worksheet For Kids

ماث شيت – Math Worksheet 2

ماث شيت – Math Worksheet 2 يحتوي  علي الارقام و الاعداد للاطفال في مرحلة الكي جي للتدريبات علي توصيل الارقام و كتابتها و المراجعة عليها

كي جي 1 انترفيو – KG 1 Interview Worksheet

كي جي 1 انترفيو – KG 1 Interview Worksheet بيساعدك تدرب طفلك علي اسئلة اللي بيتعرض ليها اثناء التقديم لاي مدرسة لمرحلة الحضانة تدريبات اخري

انضم إلي جروب دليل المدارس المصرية

إقرأ أكثر..

mood_bad
  • لا توجد تقييمات/تعليقات.
  • اضف تعليق