أفضل مدارس البكالوريا الدولية IB في مصر

استكمال الدراسة في الجامعات العالمية حلم بيراود أغلب الطلبة في مصر؛ عشان يتعرفوا على المناهج اللي بيتم تدريسها خارج مصر ويتعرفوا كمان على ثقافات مختلفة.

وبالتالي هنلاقي في مصر عدد كبير من المدارس بدأت تركز على الاعتماد وتقدم شهادات معتمدة تأهل الطلية لاستكمال الدراسة بره مصر بدون ما يحتاجوا ياخدوا شهادات معادلة أو غيرها.

من أشهر المدارس دي هي مدارس البكالوريا الدولية، ودي مدارس تابعة للحكومة المصرية بتهدف إلى نشر فكرة السلام وتكوين عقول دولية، وبنلاقي إن من أفضل المدارس اللي بتطبق برامج البكالوريا الدولية هي المدرسة الإنجليزية الحديثة، والمدرسة البريطانية الدولية وغيرهم.

في المقال ده هناخد جولة في مدارس البكالوريا الدولية ونتعرف أكثر على مدارسها وأهم مميزاتها وعيوبها.

ما هي مدارس البكالوريا الدولية

مدارس البكالوريا الدولية هي مدارس دولية حكومية قائمة على فكرة السلام وتقبل العقليات والثقافات المختلفة، تم إنشاء أول مقر لها في سويسرا بهدف تطوير نظام التعليم، وبعدها بدأت تنتشر المدارس دي إلى أن وصلت مصر.

من أهداف نظام البكالوريا إن يكون في نظام موحد يحل المشاكل اللي بتظهر مع تنقل الطالب من مدرسة للثانية بحكم وظيفة ولي الأمر، فالنظام دا هيضمن للطالب نفس طريقة التعليم فأي مدرسة.

مدارس البكالوريا الدولية بتقدم مناهج مختلفة عن المدارس الرسمية، والمناهج دي بتركز فيها أكثر على تنمية مهارات الطالب وحثه على التفكير والإبداع بدون ما يكون في حفظ كتير يرهق الطالب، بالإضافة إلى الاهتمام بالجانب الأخلاقي، والتعليم بيكون تحت إطار معين، بمعنى إن لو الطالب بيدرس وحدة من المنهج بهدف ترسيخ قيمة معينة فبيبدأ جميع المدرسين بالربط بين الدرس والقيمة دي قدر الإمكان، ودور المدرس هنا بيكون الإرشاد فقط.

أغلب الأنشطة داخل المدرسة بتكون قائمة على العمل الجماعي، ودا بيعطي فرصة للطالب إنه يركز على نقاط القوة عنده ويطورها، وبتغطي على نقاط الضعف، وبالتالي بتزود ثقة الطالب في نفسه.

المدارس دي بيُقبل عليها عدد كبير من الطلبة في مصر كل سنة؛ وده لإنها أثبتت نجاح البرامج التعليمية اللي بتقدمها لجميع المراحل الدراسية، والبرامج دي هنعرفها بالتفصيل.

برامج الدراسة في مدارس البكالوريا الدولية IB

مدارس البكالوريا الدولية مختلفة اختلاف كلي عن باقي المدارس الموجودة في مصر، ونظامها قائم على 4 برامج دراسية أساسية وهم:

الـ Primary years programme (PYP)

البرنامج دا هو أول برنامج دراسي لطلبة مدارس البكالوريا الدولية واختصاره PYP، وبيبدأ من سن 3 سنوات إلى 12 سنة.

الطفل هنا بيتعلم كتير من المهارات الأكاديمية، وبيتعلم كمان القيم والمبادئ المختلفة.

هدف المدرسة زي ما وضحنا هو خلق جيل منفتح يتمتع بعقلية دولية ومتقبل للعقليات والثقافات المختلفة، وبالتالي المدرسة بتكون حريصة على تحقيق الهدف ده من بداية دخول الطفل المدرسة فبتبدأ تفهمه إنه جزء من عالم كبير فيه اختلافات لازم يعرفها ويتقبلها لكن يظل محتفظ بمبادئه.

في المرحلة دي الدراسة بتكون قائمة على فكرة البحث، ومش بيكون في اعتماد على الكتب المدرسية، والطالب بيدرس:

• اللغة العربية
• اللغة الإنجليزية
• الرياضيات
• الأنشطة

الـ Middle years programme (MYP)

الاهتمام في المرحلة دي بيكون مُنصب ناحية التطبيق على أرض الواقع، مع التركيز بردو على الهدف الأساسي للمدرسة.

كمان بيكون في تركيز على ميول الطالب ودعمه لحد ما يوصل لهدفه.

الطالب هنا بيمتحن نفس امتحانات الحكومة المصرية في مادة اللغة العربية، والدراسات الاجتماعية، والتربية الدينية، أما باقي المواد فبتكون تابعة للخطة التعليمية والمناهج اللي بتتبعها مدارس البكالوريا الدولية، والامتحانات بتكون في منتصف ونهاية العام.

البرنامج بيعتمد بشكل أساسي على البحث لإيجاد المعلومات زي مرحلة PYP.

الـ Diploma programme (DP)

مرحلة دراسة برنامج الـ DP بتشبه مرحلة الثانوية العامة في المدارس الرسمية، وبتبدأ من سن 16 إلى 19 سنة، والبرنامج بيركز على تأهيل الطالب للتعليم الجامعي وبيعده لاستكمال دراسته في الجامعات العالمية.

برنامج وظيفي ومهني مرتبط بالمجال

تم اعتماد البرنامج ده مؤخرًا، وهو برنامج مرتبط بالمجال اللي الطالب هيكمل فيه دراسته.

قائمة بمدارس البكالوريا الدولية IB في مصر

مع نجاح نظام الدراسة في مدارس البكالوريا الدولية بدأت مصر بإنشاء العديد من المدارس في المحافظات المختلفة، ومن أشهرها:

مدارس البكالوريا الدولية في القاهرة

• مدرسة رويال كوليدج الدولية
• مدرسة هايليبيري القاهرة
• المدرسة الأوروبية بالقاهرة الجديدة
• منارة هليوبوليس الدولية بمدينة نصر
• مدرسة جرين لاند الدولية بالشيخ زايد
• بيفرلي هيلز الألمانية بالشيخ زايد
• مدرسة برينستون الدولية
• كيدز انترناشونال كوليدج بالتجمع الخامس

مدارس البكالوريا الدولية في باقي محافظات مصر

من مدارس البكالوريا الدولية في محافظات مصر:

• اكاديمية الاسكندرية الدولية
• مدرسة نفرتاري الدولية بالقليوبية
• مدرسة الأرض المخضرة الدولية بالجيزة

أفضل مدارس البكالوريا الدولية IB في مصر

اختيار أفضل مدرسة للطفل هي مهمة ولي الأمر؛ لإن اختياره ده بيترتب عليه مستقبل ابنه، عشان كده لازم يبقى في حرص من ولي الأمر إنه يختار المدرسة اللي هتساعد ابنه يطور مهاراته ويتفوق فيها بشرط إن نظام المدرسة يكون مناسب لإمكانيات الطفل.

في حالة اختيار التقديم في مدارس البكالوريا الدولية فبنلاقي إن من أفضل مدارس البكالوريا الدولية الموجودة في مصر:

المدرسة الانجليزية الحديثة

توجد المدرسة في القاهرة بجوار البنك التجاري الدولي، وتقييماتها من أولياء الأمور ممتازة.
أحد المعلقين على المدرسة بيقول إنها من أعظم المدارس في مصر والدول العربية؛ لإنها بتتميز بوجود مجموعة متميزة من المدرسين اللي بيساعدوا على نجاح المدرسة، بالإضافة إلى الأنشطة اللي بتساعد الطلبة على تطوير مهاراتهم باستمرار.

أرقام التواصل مع المدرسة:
26170005 – 0122261646 – 0122261656

المدرسة البريطانية الدولية

تعتبر من أشهر المدارس الدولية، تم إنشائها في عام 1976 ومشهورة برعاية الطلبة والاهتمام بتطوير مهاراتهم وحثهم على الإبداع، وكمان الطلبة اللي في المدرسة دي مستوياتهم مرتفعة.

المدرسة موجودة في الجيزة، وتقدر توصلها من طريق القاهرة الإسكندرية الصحراوي.
للتواصل مع المدرسة:
0238270444

مدرسة هايليبيري القاهرة

دي مدرسة انترناشونال بتمنح للطلبة الشهادة البريطانية وشهادة البكالوريا الدولية، وبتحرص جدا على مشاركة الطالب في الأنشطة المختلفة بعد انتهائه من الدروس، والأنشطة دي هي اللي بتساعده في بناء شخصية الطالب وتطويرها.
عنوان المدرسة: آي سيتي ماونتن فيو – 6 أكتوبر – الجيزة.
للتواصل مع المدرسة: 01204555559

أرخص مدارس البكالوريا الدولية IB في مصر

مع ارتفاع قيمة المصاريف اللي بتطلبها المدارس في الفترة الأخيرة بيبدأ ولي الأمر يبحث عن أنسب مدرسة لابنه بأرخص مصاريف.

بالنسبة لمدارس البكالوريا الدولية بنلاقي إن من أرخص المدارس:

المدرسة المصرية الدولية بالمعراج

المدرسة موجودة في مدينة المعراج في القاهرة، ومصاريفها تعتبر أرخص مصاريف مطلوبة على مستوى جميع مدارس البكالوريا الدولية في مصر، فبنلاقي إن أسعار المدرسة بتبدأ من 16050 جنيه مصري.

المدرسة المصرية الدولية بالتجمع الخامس

تعتبر المدرسة المصرية الدولية من أرخص مدارس البكالوريا الدولية في القاهرة، وأسعارها بتبدأ من 18600 جنيه مصري تبعًا لآخر القرارات الصادرة.

مدارس الرؤية الجديدة الدولية

عنوان المدارس دي في الشيخ زايد – 6 أكتوبر – الجيزة، مصاريفها بتبدأ من 25000 جنيه مصري.

مميزات مدارس البكالوريا الدولية

اختلاف مدارس البكالوريا الدولية عن المدارس الرسمية أو غيرها بيكسبها كتير من المميزات زي:

تقديم شهادة معترف بها دوليا

مدارس البكالوريا الدولية في مصر بتقدم للطلبة في نهاية دراستهم شهادة معترف بيها دوليًا، وبالتالي بيقدروا يكملوا تعليمهم الجامعي بره مصر ويتعرفوا على المناهج والثقافات المختلفة.

تخفيف الضغط النفسي على الطالب

تركيز المدرسة بيكون منصب ناحية خلق جيل واعي بالقضايا اللي بتدور حواليه وقادر يتعامل كويس معاها ويتقبلها، وبالتالي فهي بتهتم أكثر بالأنشطة والمشاركة بغض النظر عن درجات الطالب.

بالتالي الطالب مش هيكون عليه ضغط نفسي كبير وهيركز أكثر على تطوير نفسه خلال سنوات دراسته في المدرسة.

الانفتاح وتكوين عقليات دولية

مدارس البكالوريا الدولية بتهتم بترسيخ فكرة إن الطالب جزء من مجتمع كبير بيأثر فيه ويتأثر بيه، وبالتالي لازم يتعرف على العالم ده عشان يقدر يتعايش معاه ويتقبل ثقافاته المختلفة.

تركيز المدرسة على النقطة دي بيساعدها تخرج أجيال قادرة تتعامل صح مع التغيرات اللي بتحصل حواليها وتتقبل الاختلافات بدون صدام مع الثقافات الأخرى، كمان بيساعد الطالب إنه يكتسب مهارات جديدة.

حث الطالب على العمل الجماعي

أغلب الأنشطة اللي بيقوم بيها الطلبة داخل المدرسة قائمة على العمل الجماعي، والنقطة دي بتزود ثقة الطالب في نفسه وبتبرز نقاط القوة في شخصيته وتخليه يركز على تطويرها، بجانب إنها بتغطي على نقاط الضعف عنده.

وجود نخبة من المعلمين الأكفاء

مدارس البكالوريا الدولية بتكون حريصة إن المعلمين يكونوا قادرين فعلا على تطبيق البرامج التعليمية بشكل صحيح ويوصلوا للهدف المنشود، وبالتالي بيكون في برامج تدريبية خاصة بمعلمين المدارس دي بتساعد في تطويرهم ومنها بتساعد على تطوير المدارس.

خضوع المدرسة للتقييم المستمر

حصول مدارس البكالوريا في مصر على الاعتماد مش بيكون سهل، وبيكون في تقييم بشكل دوري للمدرسة ومعرفة آراء أولياء الأمور وغيرها قبل الاعتماد.

التقييم ده مش بينتهي بعد الحصول على الاعتماد، لكن بيكون في رقابة ومتابعة مستمرة للمدرسة للتأكد من تطبيق البرامج التعليمية بشكل صحيح.

عيوب مدارس البكالوريا الدولية

دايما فكل نظام تعليمي مختلف بنلاقي مجموعة من العيوب اللي ممكن تظهر في بداية تطبيق النظام أو بعد فترة، والعيوب دي بتخلي أولياء الأمور يفكروا أكثر من مرة قبل ما ياخدوا قرار التقديم.

دور ولي الأمر في الحالة دي إنه يدرس العيوب دي كويس ويقارن بينها وبين المميزات اللي بيقدمها النظام التعليمي، ويتأكد غن العيوب دي مش هتأثر بالسلب على ابنه بعد كده.

من عيوب مدارس البكالوريا في مصر:

عدم تقبل بعض أولياء الأمور للفكرة

الأفكار الجديدة دايما بتقابل نقد من البعض؛ بسبب اختلافها عن النظام المتعارف عليه، لكن مع الوقت الناس بتبدأ تتقبلها وتفهم كويس المخزى منها.

بالنسبة لفكرة مدارس البكالوريا في مصر بنلاقي إن بعض أولياء الأمور لسه مش متقبلينها، وشايفين إن المدرسة بتهتم أكثر بترسيخ فكرة السلام والعقلية الدولية لكن مش بتهتم بتعليم أولادهم كويس؛ لإن الامتحانات اللي بيخضع لها الطالب بتكون قليلة.

أولياء الأمور وصلوا لرأيهم دا بعد مقارنة نظام البكالوريا بالأنظمة التعليمية اللي بتكون قائمة على نظام الحفظ والتلقين بهدف حصول الطالب على درجات عالية في نهاية السنة تؤهله للسنة اللي بعدها.

لكن بإعادة النظر في أهداف المدرسة وفهم طريقة تطبيق النظام ومعرفة المميزات اللي بيحصل عليها الطالب من دراسته في مدارس البكالوريا هتبدأ وجهة النظر دي تتغير.

ارتفاع التكلفة المادية

مدارس البكالوريا الدولية بتقدم للطالب خدمات إضافية عن المدارس الرسمية، والخدمات دي بتكون بمقابل مادي بيتم سداده كل عام، لكن البعض بيشوف إن القيمة المادية اللي بيتم دفعها بتكون أعلى من قيمة الخدمات اللي بتقدمها المدرسة.