الفرق بين التعليم الخاص والتجريبي واللغات في مصر

الفرق بين التعليم الخاص والتجريبي واللغات في مصر

بيختلف التعليم الخاص والتجريبي واللغات في مدارس مصر من ناحية طريقة التدريس، والنظام التعليمي اللي بيتم تطبيقه في المدارس دي ككل، ودا بيصعب على أولياء الأمور قرار اختيار المدرسة المناسبة لأولادهم.

وبيبدءوا يسألوا الناس اللي حوليهم عشان يساعدوهم بناءً على تجاربهم. ولكن دا مش بيكون تصرف سليم؛ لإن دايمًا في فروقات فردية بين كل طالب والتاني، وممكن المدرسة المناسبة لطالب ما تكونش مناسبة لابنك. 

بالتالي لازم نتعرف بالتفصيل على الفرق بين التعليم الخاص والتجريبي واللغات في المدارس، ونعرف أهم المميزات والعيوب في المدارس دي عشان نقدر ناخد قرار صحيح، ومناسب لإمكانيات ومهارات أولادنا.

ما هو التعليم الخاص وأنواعه

التعليم الخاص في مصر هو التعليم في المدارس المملوكة لمؤسسات أو أفراد، والمدارس دي بتقدم بعض المميزات الخدمية بتفوق مميزات المدارس الرسمية، وطبعًا دا مقابل مصاريف سنوية بيسددها ولي الأمر.

مناهج التعليم الخاص إما بتكون هي نفس مناهج الحكومة المصرية بنفس اللغة، أو نفس المناهج مع تدريسها باللغة الإنجليزية، أو مناهج مختلفة تمامًا عن المنهج المصري، ودا بيختلف من مدرسة للتانية تبعًا لنوعها. 

الفرق بين التعليم الخاص والتجريبي واللغات بيوضح في أكثر من نقطة؛ فبنلاقي إن التعليم في المدارس الخاصة في مصر بينقسم لـ 3 أنواع، وهي:

تعليم خاص عربي

المدارس الخاصة العربي هي مدارس بتقدم نفس مناهج الحكومة المصرية باللغة العربية حتى مادة الرياضيات والعلوم، وبيتضاف على كتاب Connect للغة الإنجليزية كتاب Connect plus كمان، لتحسين اللغة عند الطالب.

والمدارس دي بتتميز عن المدارس الرسمية في إن القائمين عليها بيهتموا دايماً بتطويرها، وتقديم أفضل الخدمات التعليمية للطالب. 

كمان بتهتم بتنمية مهارات الطالب باستمرار بجانب اهتمامها برفع مستواه الدراسي خلال فترة تواجده داخل المدرسة.

تعليم خاص لغات

التعليم الخاص في مدارس اللغات بيشبه نظام التعليم في المدارس الرسمية للغات -التجريبية سابقًا-، ودا لإنه بيقدم مناهج حكومية باللغة الإنجليزية بتساعد الطالب على إتقان اللغة بسهولة، وبيختلف عن الخاص العربي في إن مادة العلوم والرياضيات بيكونوا باللغة الإنجليزية.

في النظام دا بنلاقي إن اختيار المدرسين بعناية، عشان يقدروا يطبقوا النمط التعليمي المطلوب.

أما عدد الطلبة في فصول المدارس الخاصة لغات فمش بتزيد عن 35 طالب، وبالتالي المدرس بيقدر يهتم بكل طالب لوحده، ويعرف مستواه الدراسي كويس جداً،  ومن هنا يعرف الخطة المناسبة اللي هيتعامل بيها مع كل طالب عشان يساعده على التفوق، والوصول لحلمه.

تعليم انترناشونال خاص

المدارس الانترناشونال في مصر هي مدارس بتقدم أنظمة تعليمية معتمدة دوليًا، والمناهج دي بتختلف من مدرسة للتانية.

فعلى سبيل المثال بنلاقى إن المدارس الأمريكية بتقدم مناهج تابعة لأمريكا، وبتؤهل الطلبة لاستكمال دراستهم الجامعية خارج مصر، وباقي المدارس سواء البريطانية، أو الكندية، أو غيرها بتمشي على نفس النسق دا.

بعض المدارس الانترناشونال في مصر بتكون خاصة؛ غير تابعة لوزارة التربية والتعليم المصرية، والمدارس دي بتحرص على تطبيق أنظمة تعليمية متميزة تساعد في بناء جيل واعي مطلع على الثقافات المختلفة، وبتركز بشكل كبير على اللغة الإنجليزية، فبالإضافة لكتاب الـ Connect، والـ Connect plus بيكون في كتاب إضافي خاص بالمدرسة .

كمان المدارس دي بتقدم لخريجيها شهادات معتمدة بتؤهلهم لاستكمال دراستهم في أكبر الجامعات العالمية، وتحقيق أحلامهم.

ما هو التعليم التجريبي وأنواعه

بين التجارب الأنسب واللي عليها إقبال كبير هي المدارس التجريبي، وهي مدارس تابعة لوزارة التربية والتعليم المصرية، وبتقدم نفس المناهج اللي بيتم تدريسها في المدارس الرسمية، ولكن باللغة الإنجليزية. 

المدارس دي بتهتم بتأسيس الطالب في اللغات، فبتدرس المواد الأساسية زي: الرياضيات، والعلوم باللغة الإنجليزية، وبتطبق مناهج وزارة التربية والتعليم المصرية بجانب برنامج مكثف للغة الإنجليزية يساعده على إتقان اللغة بسهولة. 

التعليم التجريبي بينقسم لقسمين، وهما:

تجريبي عادي

المدارس التجريبية بتقدم خدمات تعليمية أفضل من الموجودة في المدارس الرسمية، فبنلاقي إن عدد الطلبة في الفصول لا يزيد عن 40 طالب؛ عشان المدرس يقدر يهتم بكل طالب لوحده، ويساعده على فهم المواد العلمية، والتفوق في الدراسة.

في التعليم التجريبي العادي بيدرس الطالب مادة اللغة الإنجليزية كلغة أجنبية أولى، وبيبدأ دراستها من السنين الأولى، ومادة اللغة الفرنسية كلغة أجنبية ثانية، وبتبدأ معاه من الصف الأول الثانوي.

من أهم مميزات المدارس التجريبية حرصها على ممارسة الطلاب للأنشطة المختلفة اللي بتساعده على اكتساب مهارات جديدة باستمرار، وبنلاقي إن سن التقديم بيبدأ من أول 5 سنوات و 6 أشهر.

تجريبي مميز

دا نظام بيشبه التجريبي العادي، لكن بيكون أفضل منه في عدد من النقاط منها:

  • تدريس اللغة الأجنبية الثانية “الفرنسية”، بداية من الصف الرابع الابتدائي، وبعضها بداية من الصف الأول الابتدائي.
  • قبول الطفل بداية من سن 4 سنوات.
  • عدد الطلبة أقل في الفصول.

بنلاحظ إن مقابل المميزات الإضافية اللي بتقدمها المدارس في نظام التعليم التجريبي المميز بيكون في مصاريف دراسية أعلى من التجريبي العادي، فالمصاريف هنا زي ما صرحت الوزارة للعام الدراسي 2023 – 2024  لمرحلة رياض الأطفال 1880، وبتوصل المرحلة الابتدائية لمصروفات 2274 جنيه، والمرحلة الثانوية 1830.

أنواع المدارس اللغات في مصر

أنواع المدارس اللغات في مصر

استكمالًا للكلام عن التعليم الخاص والتجريبي واللغات في مصر خلينا نقولك إن كلمة مدرسة لغات بتطلق على جميع المدارس اللي بتدرس مناهجها بلغة غير اللغة العربية سواء كانت المناهج دي تابعة لوزارة التربية والتعليم المصرية أو مناهج دولية.

والمدارس دي بتسهل على الطالب إتقان اللغات المختلفة، وبتخليه يطلع على الثقافات المختلفة. وبنتقسم إلى:

مدارس ناشونال

المدارس الناشونال “المدارس الأهلية” في مصر هي مدارس خاضعة لإشراف وزارة التربية والتعليم المصرية، وتشبه المدارس التجريبية في كونها بتقدم خدمة تعليمية مميزة تركز فيها على إتقان الطالب للغات، بجانب الاهتمام بمستواه العلمي والأخلاقي. 

المدارس بتتبع نفس مناهج وزارة التربية والتعليم المصرية، بجانب تدريس بعض المناهج الإضافية اللي بتساعد على تكوين جيل واعي مثقف.

مدارس انترناشونال

المدارس الانترناشونال زي ما ذكرنا ممكن تكون تابعة لمؤسسة حكومية أو مؤسسات خاصة.

والمدارس دي بتكون اختيار مميز للطلبة اللي حابين يكملوا دراستهم بره مصر؛ لإنها بتحرص على تأهيلهم للجامعات العالمية من خلال أنظمة تعليمية متطورة بتوسع آفاق الطلاب، ومن خلالها بيقدروا يتعرفوا على الثقافات، والحضارات المختلفة في الدول الأوروبية.

بالتالي الطالب بيكون عنده فرصة لاكتساب عدد كبير من المهارات أثناء دراسته، والفرصة دي مش موجودة في المدارس الرسمية. 

وبكدا عرفنا الفرق بين التعليم الخاص والتجريبي واللغات من ناحية أنواع مدارسهم.

اعرف أكتر عن: الفرق بين المدارس الناشونال والانترناشونال في مصر.

مميزات التعليم الخاص والتجريبي واللغات

مميزات التعليم الخاص والتجريبي

كل نظام تعليمي بيكون له مجموعة من المميزات اللي بتخلي أولياء الأمور يقبلوا عليه، ويقدموا فيه لأولادهم، بالإضافة إلى بعض العيوب اللي لازم يفكروا فيها كويس قبل التقديم، والكلام دا ينطبق بردو على التعليم الخاص والتجريبي واللغات في مصر.

مميزات المدارس الخاصة 

المدارس الخاصة بتتميز عن المدارس الرسمية في: 

  • الاهتمام بأنشطة التقييم المستمر لمستوى الطالب.
  • شرح المنهج المصري بطريقة متطورة ومختلفة.
  • وجود عدد محدود من الطلبة في الفصول.

 مميزات المدارس التجريبية

  • تعزيز روح المشاركة بين الطلاب.
  • كثافة طلابية أقل من الحكومة.
  • الاهتمام بتدريس اللغات.
  • مجتمع أفضل للطفل.

مميزات المدارس الدولية

  • تطبيق نمط تعليمي حديث مواكب للتغيرات الموجودة.
  • تطوير مهارات الطالب، وإكسابه مهارات جديدة.
  • تقييم مستوى الطالب الدراسي باستمرار.
  • إطلاع الطالب على الثقافات المختلفة.
  • إتقان الطالب للغات المختلفة.
  • تقديم شهادة معتمدة دوليًا.

عيوب التعليم الخاص والتجريبي واللغات

عيوب التعليم الخاص والتجريبي واللغات

من أبرز عيوب الأنظمة دي بنلاقي:

عيوب المدارس الخاصة

  •  تدريس نفس مناهج وزارة التربية والتعليم المصرية.
  •  عدم الاهتمام بتطوير مهارات الطالب بقدر كافي.
  • ارتفاع مصاريف المدرسة على بعض أولياء الأمور .
  • أغلب المناهج معتمدة على الحفظ.
  • التقييم بيكون من خلال الامتحانات.
  • قصور اللغة العربية.

عيوب المدارس التجريبية

 المدارس التجريبية شبيهة للمدارس الخاصة، لكنها تابعة لوزارة التربية والتعليم المصرية، وبالتالي بنلاقي إن أغلب عيوب المدارس الخاصة موجودة بالفعل في المدارس التجريبية في مصر بالإضافة إلى: 

  • بدء تدريس اللغة الأجنبية الثانية في المرحلة الإعدادية في مدارس التجريبي العادي.
  • تكدس عدد الطلبة في الفصول.

عيوب المدارس الدولية 

  • تواجد المدارس في عدد محدود من محافظات مصر.
  • تدريس جميع المناهج باللغة الانجليزية.
  • ضعف اللغة العربية “اللغة الأم للطالب”.
  • ارتفاع المصاريف السنوية المطلوبة.
  • التدليل الزائد في بعض المدارس.

ما هي العوامل التي يجب أخذها في الاعتبار لاختيار النظام المناسب لطفلك؟

اختيار النظام الأنسب بين التعليم الخاص والتجريبي واللغات بيعتمد على عوامل أهمهم:

  • القدرة المالية من أهم العوامل المحددة لنوع التعليم سواء مصري، أو خاص، أو دولي.
  • استيعاب الطالب أو نوعية الطالب، لإن كل نظام محتاج نوع معين من الطلبة.
  • تحديد مستقبل معين للابن هل هيسافر يكمل تعليم برة مصر أو لأ.
  • جودة التعليم اللي بيتأملها الأهل من المدرسة واللي بتختلف من نظام للتاني.

لإن ابنك محتاج يتأسس بشكل عام من أول اللغة الأم، لمهارات التواصل، والتعامل مع المجتمع، وفهم المعلومة، والتعبير عنها، ولإن المدرسة بتلعب دور كبير في دا، فاحرص إنك تاخد وقتك في المقارنة بين أنظمة المدارس المتاحة واختيار الأنسب له.

وأخيراً، التعليم الخاص والتجريبي واللغات في مصر بيختلفوا في العديد من النقاط، وكل نوع تعليم له مميزات وعيوب، وفي المقال دا قدمنالك أهم المعلومات اللي محتاج تعرفها قبل اختيار المدرسة.

دليل المدارس المصرية

ابحث عن المدرسة واحصل علي أدق النتائج وكافة المعلومات.

انضم إلي جروب دليل المدارس المصرية لو عندك اي استفسار

إقرأ أكثر..

  • لا توجد تعليقات بعد.
  • أضف تعليق