أهم 4 أنواع المدارس الثانوية في مصر

بعد مرحلة الإعدادية بيبدأ الأب والأم يبحثوا لأولادهم عن أفضل المدارس عشان ابنهم يدرس فيها الثانوية، وبالتالي يضمنوا لابنهم دخول الجامعة اللي بيتمناها.
ومع تعدد أنواع المدارس الثانوية في مصر هنلاقي الأب والأم قدامهم خيارات كتير ومتنوعة زي مدارس الثانوية العامة والمدارس الثانوية الدولية بأنواعها المختلفة بالإضافة للمدارس الثانوية للعلوم والتكنولوجيا للطلبة المتفوقين وكمان المدارس الثانوية الفنية. في المقال هنتعرف أكتر على أهم 4 أنواع المدارس الثانوية في مصر 2021.

1. مدارس الثانوية العامة

بتعتبر مدارس الثانوية العامة الأشهر في أنواع المدارس الثانوية في مصر وبيتجه ليها عدد كبير من أولياء الأمور عشان ابنهم يدرس فيها وبيكون متاح للطالب دخولها على حسب مجموعة واللي بيختلف ما بين محافظة والتانية.

مؤخرًا شهد نظام التعليم في الثانوية العامة تغييرات واسعة وكبيرة فتم تحويل النظام عشان يكون اعتماده الأكبر على التكنولوجي ويكون نظام الدراسة والتصحيح والامتحانات إلكتروني، بالإضافة إلى إن الدراسة أصبحت تراكمية يعني الطالب عشان يدخل الجامعة هيتم احتساب مجموعة في الثلاث سنوات مش في آخر سنة بس زي ما كان معتاد في النظام القديم.

أما بالنسبة لطريقة الدراسة والامتحانات فهنلاقي إن الاعتماد الأكبر أصبح على الطالب وبحثه واطلاعه على المعلومة، لكن ما تزال المواد الدراسية زي ماهي فهنلاقي الطالب سواء كان شعبة علمية أو شعبة أدبية بيدرس مواد مشتركة وهي:
1- اللغة العربية
2- اللغة الأجنبية الأول (غالبًا بتكون الإنجليزية)
3- اللغة الأجنبية الثانية (إيطالي، فرنساوي، ألماني .. وغيرها)

أما طالب العلمي في ظل النظام التراكمي فالمتوقع إنه هيدرس مواد علمي رياضة وعلمي علوم فهيدرس:
1- فيزياء
2- كمياء
3- أحياء
4- جيولوجيا
5- رياضيات بحتة
6- رياضيات تطبيقية

مواد الشعبة الأدبية:
1- تاريخ
2- جغرافيا
3- علم نفس
4- فلسفة ومنطق

عشان في النهاية تظهر مميزات وعيوب النظام كونه مازال نظام جديد هيمر بمراحل تعديل مختلفة وواسعة.

مميزات نظام الثانوية العامة

من مميزات الثاوية العامة هنلاقي:

1- فرصة لتعليم أفضل باعتماد الطالب على نفسه واتباع أساليب تعليم مختلفة.
2- إتاحة مصادر تعليم مختلفة تساعد الطالب أهمها بنك المعرفة.
3- توفير فرص متساوية للجميع بالتصحيح الإلكتروني.

عيوب نظام الثانوية العامة

برغم المميزات الموجودة في النظام هتظهر مجموعة من العيوب زي:

1- الأعطال الفنية اللي ممكن تحصل بالاعتماد الكلي على التكنولوجيا.
2- العبء المادي والمعنوي اللي هيتحمله الطالب في ظل وجود النظام التراكمي.
3- عدم الوضوح لمعايير التقييم، وعدم الاستقرار.

2. المدارس الثانوية الدولية في مصر

المدارس الثانوية الدولية من أهم أنواع المدارس الثانوية في مصر اللي بيلجأ ليها كتير من أولياء الأمور هربََا من عيوب الثانوية العامة، هنتعرف أكتر على كل أنواع المدارس الثانوية الدولية وعيوب ومميزات كل منهم بداية من نظام الثانوية البريطانية…

المدارس الثانوية البريطانية

تعرف بـ IGCSE وهي شهادة دولية معتمدة للمرحلة الثانوية تحت إشراف جامعة كامبريدج البريطانية، متاح للطالب يدرس في النظام البريطاني بداية من سن 5 سنوات حتى سن 16 سنة ودا بيخليه من أهم أنواع المدارس الثانوية في مصر.

بيعتمد على دراسة مواد منفصلة وبيمتحن الطالب في كل مادة وبياخد فيها درجة الـ IG بشكل مستقل، وبيقدم للطالب خيارات واسعة من المجالات المتنوعة اللي يقدر الطالب فيما بعد يتوسع فيها في الجامعة.
بتظهر مميزات في إنه:

1. دراسة المنهج البريطاني بدون مشقة وتكلفة.
2. اختيار التخصص في سن مبكر اللي هيساعد الطالب يتعمق في المجال بشكل أكبر.
3. تنمية المهارات المختلفة للطالب والتركيز على اكتساب المعرفة.

في المقابل بتظهر العيوب واللي منها:

1. ضغط كبير بيتحمله الطالب بسبب المجموع التراكمي.
2. إلغاء اللغة العربية تقريبًا اللي هيفقد الطالب العربي جزء من هويته الأساسية.
3. صعوبة الوصول لمعلمين متخصصين في تدريس مواد الـ IG.
   ممكن تتعرف أكتر على مواد نظام IGCSE من هنا.

المدارس الثانوية الأمريكية

عبارة عن دبلومة بتعادل الشهادة الثانوية والقبول للجامعات بيكون على حسب اجتياز ما يعرف بامتحان الـ SAT وتقييم الطالب بيكون على الأنشطة مختلفة ومتنوعة بالإضافة للامتحانات النهائية.

بتظهر مميزات الدبلومة الأمريكية في:

1. البحث والاطلاع بتوفير مصادر متنوعة وإضافية تسهل على الطالب وصوله للمعلومة.
2. شهادة قوية بتتيح للطالب الالتحاق بالجامعات المصرية والجامعات الأمريكية وكل الجامعات على مستوى العالم.
3. اختلاف المناهج بحيث يناسب كل فئة عمرية وبتكون مناهج أمريكية.

أما عن العيوب:

1. بعض المناهج اللي بيقدمها البرنامج غير كافة عشان تأهل الطالب للمرحلة الجامعية.
2. مؤخرًا تم إلغاء اعتماد امتحان الـ SAT في مصر وممكن يمتحنه ويدرس في اي جامعة خارج مصر، أو يمتحن امتحان EST واللي مسؤؤلة عنه وزارة التعليم المصري فقط.

المدارس الثانوية الكندية

الدبلومة الكندية وتعرف اختصارًا بـ OSSD وعبارة عن شهادة معترف بها من وزارة التعليم المصري ووزارة التعليم الكندي في نفس الوقت بيتخرج وهو معاه شهادتين.
بيختار الطالب ما بين ٤ مجموعات دراسية هتتيح ليه اختيار تخصصه في الجامعة بعد كده، والتقييم بيكون متقسم جزء الأكبر منه على المشاريع والواجبات اللي بيعملها الطالب طول فترة الدراسة والجزء الأقل على الامتحان النهائي.

من مميزات النوع دا:

1. بتعتمد على نظام المواد مش الفصول.
2. متاح للطالب فرصة للالتحاق بالجامعات الكندية.
3. الاعتماد الدولي للمناهج الكندية اللي بيدرسها الطالب.

وبتظهر العيوب في:

1. لازم الطالب يكون مستواه في اللغة الإنجليزية فوق المتوسط عشان يقدر ينجح في دراسته.
2. ارتفاع التكلفة.

المدارس الثانوية الألمانية

معروف بـ Abitur برنامج تعليمي مدته 12 سنة وبينتهي في النهاية بيحصةل الطالب على شهادة الـ Abitur اللي بتتيح ليه فرصة قوية للالتحاق بالجامعات الألمانية.

وأهم المميزات:

1. يتميز النظام التعليم الألماني بجودة الاستراتيجية التعليمة.
2. رسوم الجامعات الألمانية منخفضة ومع وجود جودة تعليم تنافسية

العيوب بتتمثل في:

1. الضغط اللي بيكون فيه الطالب عشان يجتاز الامتحان ويحصل على درجات عالية في آخر سنتين ليه.
2. صعوبة امتحان الـ Abitur لأنه يؤهل لدخول جامعات بمستويات عالية.

المدارس الثانوية الفرنسية

تعرف كمان بنظام الباك الفرنسي وعبارة عن شهادة معتمدة من التعليم الفرنسي والتعليم المصري، وبيوفر 3 مسارات متنوعة بيختار الطالب منهم مستر واحد عشان يكمل فيه فيما بعد.

من أهم المميزات:

1. إتاحة الجامعات والمعاهد الفرنسية الواسعة.
2. التعمق في اللغات تانية بجانب اللغة الفرنسية
3. يتميز بتفكير قيادي وابتكاري كبير.

لكن كمان بتظهر العيوب واللي منها:

1. لازم الطالب يكون بيتحدث الفرنسية بطلاقة ومتقن ليها.
2. تعدد الاختبارات وتنوعها اللي بيخضع ليها الكالب بشكل كبير.

المدارس الثانوية الإيطالية

من أنواع المدارس الفنية في مصر واللي موجودة من فترة كبيرة وبتكون متاحة للطالب من بعد المرحلة الإعدادية وبيطلق عليها “مدارس الدون بوسكو”.

بيتميز بإن تنسيقها أعلى من تنسيق الثانوية العامة، ويدرس فيها الطالب 3 سنوات لإعداد تقني متخصص، أو 5 سنوات لإعداد فنيين (مساعد مهندس).

بتظهر أهم المميزات في:

1. التدريب والتطبيق العملي وتوفير الآلات والمعدات اللازمة.
2. جودة تعليم عالية لإنها بتخضع لإشراف وتمويل من إيطاليا.
3. بتتيح فرصة للسفر بعد الدراسة وإكمال الدراسة والتدريب.

من العيوب:

1. بيوفر مجال واحد بس وهو المجال الهندسي بعدة تخصصات.
2. متاح الدراسة فيه للذكور فقط

نظام البكالوريا الدولية IB

تعرف اختصارًا بـ IB وهو عبارة عن نظام متاح من سن 3 سنوات حتى سن 19 سنة بـ 4 برامج مختلفة الطالب بيحصل على شهادة معتمدة بتمكنه يدرس في أفضل الجامعات المعتمدة.

بيختار مواد الدراسة ما بين 5 مجموعات دراسية ومجموعة للفنون بالإضافة لبعض المتطلبات الإلزامية عليه.

بتظهر أهم المميزات للنظام في:

1.  الاعتماد والاعتراف العالمي
2. تنمية وتطوير مهارات الطالب بشكل كبير
3. القبول الجامعي الواسع

ومع ذلك ما زال ليها عيوب وبتتمثل في:

1. التزامات وضغط بشكل كبير على الطالب
2. فترة دراسية طويلة
3. تكلفة عالية

3. المدارس الثانوية للعلوم والتكنولوجيا

من أنواع المدارس اللي متاحة للطالب المصري هي مدارس العلوم والتكنولوجيا، وتعتبر من أنواع المدارس اللي بيكون متاح قدام الطالب بعد الإعدادية التقديم ليها وبيطلق عليها “مدرسة المتفوقين في العلوم والتكنولوجيا STEM” وهي مخصصة للطلبة اللي حابه تكمل في المجال العلمي وبتكون متاحة للطلاب اللي حصلوا على درجات أعلى من 96% في الشهادة الإعدادية ومش مجرد مدرسة بس لكن نظام حياة متكامل وبتعتمد على النظام الأمريكي في التعليم واللغة الإنجليزية هي اللغة الأساسية للدراسة.

الطالب بيكون مطالب بدراسة مواد:

• اللغة العربية
• اللغة الإنجليزية
• لغة ثانية: بتكون إما ألماني أو فرنساوي بس
• مادة الفيزياء
• مادة الأحياء
• مادة الكيمياء
•  مادة رياضيات
• مادة الجيولوجيا
• مادة دراسات اجتماعية
• ميكانيكا
• تكنولوجيا المعلومات It
  بالإضافة إلى capstone مشروع بيسلمه الطالب.

ممكن تتعرف على مناهج المدارس الثانوية للعلوم والتكنولوجيا من هنا.

بتظهر مميزات المدرسة في:

• أسلوب تعليم مميز بيوفر فرصة تعلم واطلاع واسعة للطالب عشان يكتسب العلوم والمعارف والمهارات اللي تفيده.
• فرصة أكبر للاكتشافات العلمية.

وفي المقابل أهم العيوب:

• بيتعرض الطالب لضغط كبير بسبب أسلوب الدراسة والحاجات اللي بتكون مطلوبه منه.
• القبول في الجامعات لطالب المدارس دي بتكون فرصته أقل من غيره ونسبته بسيطة جدًا.

4. المدارس الثانوية الفنية في مصر

من أنواع المدارس اللي بتكون متنوعة ومتاحة للطالب هي المدارس الثانوية الفنية في مصر، وبيظهر تنوع واسع في المدارس دي فهنلاقي:

الثانوي الفني التجاري

بيظهر تنوع في أقسامه فمثلًا متاح الشعبة العامة لمدة ثلاث سنوات، وفي شعبة التعليم الفندقي وشعبة الشئون القانونية،وغيرهم من الشعب المختلفة.
بيكون متاح للطالب دخول كلية تجارة سواء انتساب أو انتظام على مستوى الجمهورية بالإضافة لبعض المعاهد، كمان كلية التربية في بعض المحافظات.

أهم المميزات للثانوي التجاري هو التخصص لطالب اللي حابب يكمل دراسته في مجال التجارة والأعمال، أو على حسب الشعبة اللي اخترها الطالب، وأهم العيوب ممكن الطالب ياخد سنوات أطول لو كان نظام الثانوي اللي درسه 5 سنوات عشان يقدر يدخل الكلية فياخد وقت أطول.

الثانوي الفني الصناعي

بيضم الثانوي الصناعي بنظام الثلاث سنوات  10 شعب دراسية ومنها: شعبة الميكانيكة، والشعبة المعمارية، والشعبة الزخرفية وغيرهم، أما عن نظام الخمس سنوات فبيضم  11 شعبة ومنها: الشعبة النسجية، شعبة الإلكترونيات، شعبة البحرية وغيرهم.
الطالب بيكون متاح ليه دخول كليات متنوعة زي كلية الهندسة وكلية التربية، وكلية التربية النوعية والسياحة والفنادق وكليات الفنون الجميلة والتطبيقية وغيرهم.

بتظهر أهم المميزات في التنوع الواسع والكبير قدام الطالب عشان يدرس في تخصصاتات مختلفة ومتنوعة، لكن في المقابل هنلاقي الطالب بيعاني من نظرة الناس لطلاب الثانوي الفني وعدم تقديرهم والاعتراف بأهميته.

الثانوي الزراعي

بتخرج الطالب عنده الخبرة والكفاءة لإدارة المشاريع الزراعية والعمل في قطاع الزراعة سواء درس الطالب في نظام الثلاث سنوات أو الخمس سنوات.

الطالب بيكون متاح قدامه دخول كليات الزراعة على مستوى الجمهورية أو كلية التربية وكمان بعض المعاهد العليا.
أهم مميزاته نمو القطاع الزراعي في مصر وبالتالي هيجد الطالب فرص عمل متنوعة وواسعة، لكن في المقابل هنلاقي إن التعليم الفني مش واخد القدر الكافي من الاهتمام والتطوير.

الثانوي الفندقي

بيؤهل الطالب للعمل في مجال السياحة والفنادق
بينقسم لنظام الثلاث سنوات وبيكون متاح للطالب يدخل معاهد السياحة والفنادق العليا.
أما نظام الخمس سنوات بيكون متاح للطالب بالإضافة للمعاهد كمان كليات السياحة والفنادق.
وبتظهر ميزة النوع دا إن الطالب بيكون ليه فرصة واسعة للشغل في مصر وفي قطاع حيوي زي السياحة أو حتى بره مصر كمان.

 ثانوي التمريض

عشان يكون متاح للطالب دخول النوع دا من المدارس لازم تتوفر فيه بعض الشروط وهي:

1. درجة مادة اللغة الإنجليزية مش أقل من 45.
2. سن الطالب مش أقل من 15 سنة.
3. المجموع الكلي الحد الأدنى ليه 250 درجة في الشهادة الإعدادية.
   فبيكون متاح للطالب بعد ما بيخلص الثانوية معاهد التمريض سواء لنظام الثلاث سنوات أو الخمس سنوات ولكن بيتميز نظام الخمس سنوات إن فرص الدخول للجامعات والمعاهد المتاحة لطلابه أكبر من نظام الثلاث سنوات.